Mats Hummels ka thënë se nuk ka parë futbollist më të mirë se Lionel Messi në jetën e tij, pas paraqitjes mbresëlënëse të superyllit argjentinas në fitoren e Barcelonës 3:1 kundër Borussia Dortmundit në Ligën e Kampionëve të mërkurën.

Messi e shënoi një gol dhe i dhuroi dy asiste për t’ia siguruar Barcelonës kalimin në 1/8 e finales së Ligës së Kampionëve.

Për Messin ishte një ndeshje e paharrueshme, e 700-ta në karrierë për Barçën. Argjentinasi asistoi në golin e parë të Barçës të shënuar nga Luis Suarez dhe në golin e tretë të realizuar nga Antoine Griezmann.

Paraqitja e mrekullueshme nga pesë herë fituesi i Topit të Artë u lartësua nga kundërshtari i tij atë mbrëmje, qendërmbrojtësi gjerman i Dortmundit, Mats Hummels.

“Në top formë, Messi është futbollisti më i mirë që e kam parë, pikë!”, tha Hummels.

“Ne nuk ishim të mirë sa duhet për ta mposhtur Barcelonën sot. I krijuam vetëm tri apo katër shanse të mira”, shtoi ai.

“Barça ishte e shkëlqyer. Messi është gjithmonë i rrezikshëm, natyrisht”, theksoi ai. /Express/